Kopff in einem Milchkopff zu richten.

Aus: Ein new Kochbuch (1581), Kapitel 01, Teil 06, Nr. 07

Originalrezept:

Schlag Eyer auf / vnd nimm ein hölzern Löffel voll Mehls drvnter / oder wie viel zu vermeynest dz gnug sey / nimm darnach gute süsse Milch darvnter / mach sie gelb / oder laß sie weiß / streich sie durch ein Harin Tuch / vnd wenn die  Köpff gar gesotten vnd außgeseubert seyn / wiltu es in einem Silber backen / so bestreich es mit sauber Butter / thu die Köpff darein / vnd geuß die Eyer sampt der Milch darüber / setz in ein Ofen / vnd laß backen / so darffstu es nicht wider in ein ander Silber anrichten / denn es ist schon angericht / So kanstu sie auch in eim Milchkopff füllen. Bistu aber nicht bey grossen Herrn / da man in Silber anrichtet / so nimm ein Turten Pfannen / vnd thu Butter darein / mach sie wol heiß / schlag ein Ey oder zwey wol durcheinander / geuß sie in die Turten Pfannen vmb vnd vmb / so wirt es sehen wie ein Kuchen / laß es wol trucken werden / so bleibst daran hangen / leg darnach die Köpff darein / sie seyn gefüllt oder nit / geuß die Milch sampt den Eyern oben darüber / vnnd  setz sie mit den Turten Pfannen in den Ofen / vnd laß backen / wenn man die Pasteten in den Ofen scheust / Vnd wenn du die Milch vnd Eyer darüber geußt / so versaltz es nit / denn wenn du es sehr saltzest / so wirdt es wässerig. Man beckt sonderlich die Milch / die süß ist / denn wenn sie saur / so gerinnet sie / Vnd wenns gebacken / vnd du sie wilt anrichten / so nimm ein Schüssel / vnnd thu sie vber die Turten=Pfannen / stürtz vmb / so leßt es ab sampt dem Pfantzel / zeuch dasselbige herab wie ein Haut / nimm ein andere Schüssel /vnd stürtz oben darüber / vnd kehr sie allbeyd vmb / so bleibt es fein sauber und zierlich.

Also beckt man die Köpff im Milchkopff. Du kanst die Köpff auch machen in eine Teig / sonderlich in ein auffgetriebene Pasteten / vnd kanst Milch darüber giessen. Vnd man nennet es ein Milchkopf / vnd man muß es warm geben / so ist es ein herrliches Essen.

Transkription:

Waltraud Ernst

Zitierempfehlung:
Waltraud Ernst (Transkription): "Kopff in einem Milchkopff zu richten.", in: Ein new Kochbuch (1581), Kapitel 01, Teil 06, Nr. 07,
online unter: https://gastrosophie.sbg.ac.at/kbforschung/r-datenbank/?rdb_rezepte=kopff-in-einem-milchkopff-zu-richten (22.01.2022).

Datenbankeintrag erstellt von Waltraud Ernst.