Knödel vom Kalbfleisch zu machen.

Aus: Ein new Kochbuch (1581), Kapitel 01, Teil 04, Nr. 43

Originalrezept:

Nim(m) (daß) Kalbfleisch / vn(n) schneide es klein / vnd hacks durcheinander mit einem Rindtfeißt / wie vorhin vermeldt ist / vn(n) wen(n) du (daß) Fleisch gehackt hast / so nim(m) mehr dazu / auch ein geweichten Weck / Pfeffer vnnd Saffran / thu auch drey oder vier Eyer darvnter / vnd hack es durcheinander / vn(n) versaltz es nicht / Vnd wenn du es klein gehackt hast / so schneidt Mandeln darein / die klein geschnitten / auch saubere kleine Rosein / vnd ein wenig Zucker / daß es ein wenig süß wirdt / thu es alles durcheinander / vnd rür es mit saubern Händen / vnd wenn du es wol gerürt hast / so mach Knödel darauß / rundt vnnd lenglicht / wirff sie in ein gesotten Wasser / laß es an die statt sieden / thu es herauß auff ein saubers Bret / vnd nim(m) geschnittene Mandeln / auch kleine Rosein/ Wein / ein wenig Essig vnd Zucker / brenn ein wenig Mehl darein / laß es miteinander sieden / nim(m) Pfeffer vnd Saffran darzu / vnd laß es auch darmit sieden / so wirstu haben ein guts Mandelgescharb / Vnd wenn du es hast auffsieden lassen / so thu die Knödel darein / vnd setz es auff heisse Eschen / so bleibt es warm / biß daß du es anrichtest / Wiltu aber haben solche Knödel / wie du die hast gemacht / so leg es auff ein Roßt / vnd breuns ab / vnnd mach darzu ein guten Pfeffer mit einem Hennenschweiß / wie es vorhin gemeldt ist / wie man Pfeffer maché sol / es sey süß oder saur / seindt auff beydee manier gut. Mach auch solche Knödel / wie du die hast gemacht / die abgebreunt seyn. Du magsts auch eindämpffen mit Wacholderbeern / oder Pettersilgen Wurtzel / vn(n) machs nicht saur / sondern mit einer Rindtfleischbrüh / vnd magst es darmit eindämpffen / so wirt es gut vnd wolgeschmack.

Transkription:

Sepp Meister, Steffi Schinagl

Zitierempfehlung:
Sepp Meister, Steffi Schinagl (Transkription): "Knödel vom Kalbfleisch zu machen.", in: Ein new Kochbuch (1581), Kapitel 01, Teil 04, Nr. 43,
online unter: https://gastrosophie.sbg.ac.at/kbforschung/r-datenbank/?rdb_rezepte=knoedel-vom-kalbfleisch-zu-machen (30.11.2022).

Datenbankeintrag erstellt von Maximilian Schmidauer.